Татарстанга беренче тапкыр “Швицкая бурая” токымлы таналар кайтарылды
Балык Бистәсенең Яңавыл авылында урнашкан “Кулон Агро” акционерлык җәмгыятенең терлекчелек комплексына Татарстанда беренче тапкыр, Россиядә дә сирәк очрый торган “Швицкая бурая” токымлы таналар кайтарылды. Хуҗалык 500 баш тананы Смоленск өлкәсендә урнашкан нәсел хуҗалыгыннан сатып алды.
Таналарны махсус транспорт белән кайтардылар. Швиц сыерлары Альп таулыклары шартларында барлыкка китерелгән. Аларның тояклары да үзенчәлекле – ташлардан һәм кыялардан йорергә яраклашкан, әлеге токыс сыерлар бик чыдам. Швейцария каны аккан сыерларның төп үзенчәлеге – майлы сөт, бер савымга 25 литрга кадәр сөт бирәләр. Нәкъ шундый сөттән чын Швейцария сыры һәм балалар өчен продуктлар ясыйлар. Барлыгы “Кулон Агро”ның 9 терлекчелек биналарында 1838 баш терлек тотыла, шулардан 900 баш – савым сыерлары.